გარდაბნის თბოელექტროსადგურის 200-მდე თანამშრომელი, მეოთხე დღეა გაფიცულია. ხელფასის გაზრდის მოთხოვნით, საპროტესტო აქცია მათ დილიდან განაახლეს.
აქციის მონაწილეები გარდაბანში, „თბილსრესის" შესასვლელთან არიან შეკრებილი.
ისინი თავდაპირველად ხელფასის 50%- ით გაზრდას ითხოვდნენ, დღეს კი აცხადებენ, რომ 300 ლარით ზრდას დათანხმდებიან და დათმობაზე წავლენ.
ორი დღის განმავლობაში გაფიცულ თანამშრომლებსა და ადმინისტრაციას შორის მოლაპარაკებების მცდელობა უშედეგოდ მთავრდებოდა.
„თბილსრესის" დირექციამ მუშებს 15-20% - იანი ზრდა შესთავაზა, რაზეც მათ უარი განაცხადეს. დღეს კი, ისინი ამბობენ, რომ ადმინისტრაციის მხრიდან გაიჟღერა დაპირებამ, იანვრიდან ხელფასების 20% -ით მომატებასთან დაკავშირებით, თუმცა ამ დაპირების წერილობითი ან დოკუმენტური მტკიცებულება ჯერ არ მიუღიათ. აქციის მონაწილეების მტკიცებით, მსგავსი დაპირება მათ ადმინისტრაციისგან მაისშიც მიიღეს და ამჯერად, მხოლოდ სიტყვაზე არ ენდობიან.