„ავიაკომპანია Ryanair -ის საქართველოში შემოსვლა ნიშნავს კიდევ უფრო მეტ წვდომას იმ ევროპულ ქვეყნებზე, რომელიც ჩვენი ქვეყნისთვის სტრატეგიულად მნიშვნელოვანია,“ - ამის შესახებ ტურიზმის ეროვნული ადმინისტრაციის ხელმძღვანელმა მარიამ ქვრივიშვილმა თბილისის საერთაშორისო აეროპორტში გამართულ ოფიციალურ მიღებაზე განაცხადა.
როგორც „ინტერპრესნიუსს“ ტურიზმის ეროვნული ადმინისტრაციიდან აცნობეს, მსოფლიოს ერთ-ერთმა უმსხვილესმა და ცნობილმა ირლანდიურმა დაბალბიუჯეტიანმა ავიაკომპანია Ryanair-მა საქართველოს ბაზარზე ოპერირება ერთდროულად ორ აეროპორტში დაიწყო. მათი ინფორმაციით, პირდაპირი ავიარეისები მილანი-თბილისის მიმართულებით, ასევე, ქუთაისიდან მარსელისა და ბოლონიის მიმართულებით უკვე სრულდება.
„ძალიან მნიშვნელოვანია მსოფლიოში ერთ-ერთი უმსხვილესი ირლანდიული ავიაკომპანია Ryanair - ის შემოსვლა საქართველოში. ეს ნიშნავს კიდევ უფრო მეტ წვდომას იმ ევროპულ ქვეყნებზე, რომელიც ჩვენი ქვეყნისთვის სტრატეგიულად მნიშვნელობვანია. Ryanair - ის შემოსვლა განაპირობებს ევროკავშირის კიდევ უფრო მეტი მოქალაქის საქართველოში ტურისტად მოგზაურობას, და რაც მთავარია ეს აისახება იმაზე რომ ჩვენს ქვეყანაში ჩამოვა კიდევ უფრო მეტი მხარჯველუნარიანი ტურისტი“, - განაცხადა ტურიზმის ეროვნული ადმინისტრაციის ხელმძღვანელმა მარიამ ქვრივიშვილმა.