„იმდენად დიდი გავლენა მოახდინა მეუფე იაკობის განცხადებამ საზოგადოებაზე, რომ უბრალოდ, მისი დატოვება ასე უპასუხისმგებლოდ არ შეიძლება", - ამის შესახებ დეპუტატმა ეკა ბესელიამ განაცხადა. მან უპასუხა კითხვას, უნდა შეიქმნას თუ არა დროებითი საგამოძიებო კომისია მეუფე იაკობის განცხადებების გამო.
„მე ვფიქრობ, ამ საკითხზე შეიძლება მსჯელობა და დისკუსია გავმართოთ, არის თუ არა ეს ფორმა ის ყველაზე შესაბამისი, რომლითაც შეიძლება, ეს საკითხები არ დარჩეს უპასუხოდ. მგონია, პროკურატურას რომ ეთქვა, გადავამოწმოთ ამ განცხადების ნამდვილობა და ჩავატაროთ გამოძიებაო, ეს საერთოდ მოხსნიდა ასეთი კომისიის შექმნის საკითხს დღის წესრიგიდან. ახლა ალბათ, ამაზე საჭირო იქნება კონსულტაციები და მეც გავივლი დამატებით კონსულტაციებს ამ საკითხზე, რადგან მგონია, ეს საკმაოდ მგრძნობიარე თემაა, მაგრამ იმდენად დიდი გავლენა მოახდინა ამ განცხადებამ საზოგადოებაზე, რომ უბრალოდ, მისი დატოვება ასე უპასუხისმგებლოდ არ შეიძლება", -განაცხადა ბესელიამ.