პარლამენტის პლენარული სხდომა დღეს ისე დასრულდა, რომ საარჩევნო სისტემის ცვლილებასთან დაკავშირებული კანონპროექტის ვერც განხილვის დასრულება მოესწრო და ვერც კენჭისყრა. როგორც პარლამენტის თავმჯდომარე არჩილ თალაკვაძემ განაცხადა, პლენარული სხდომა ხვალ 12:00 საათზე ამ საკითხის განხილვით დაიწყება.
სავარაუდოდ, კანონპროექტის პირველი მოსმენით კენჭისყრაც ხვალვე მოხდება.
შეგახსენებთ, რომ უმრავლესობის წევრი მაჟორიტარი დეპუტატების ნაწილი პროპორციულ საარჩევნო სისტემაზე გადასვლის წინააღმდეგია. ისინი გადაწყვეტილების მიღებამდე დამატებით კონსულტაციებს ითხოვდნენ, რის გამოც, საბოლოოდ ხვალვე უმრავლესობის ფორმატში შეხვედრა ჩაინიშნა.
ოპოზიციონერი და დამოუკიდებელი დეპუტატები კი აცხადებენ, რომ ეს „უნიჭოდ დადგმული სპექტაკლია“ იმისთვის, რომ საარჩევნო სისტემა არ შეიცვალოს.
შეგახსენებთ, საპარლამენტო უმრავლესობის 93 დეპუტატის მიერ შემუშავებული კანონპროექტი კონსტიტუციაში ცვლილებებს ითვალისწინებს, რომლის მიხედვითაც 2020 წლის საპარლამენტო არჩევნები პროპორციული საარჩევნო სისტემითა და ნულოვანი ბარიერით ჩატარდება.