ბათუმში პარლამენტის მიერ საარჩევნო სისტემის ცვლილების კანონპროექტის ჩაგდებასთან დაკავშირებით საპროტესტო აქცია მიმდინარეობს.

შეკრებილების განცხადებით, საქართველოს პარლამენტის დეპუტატები უმრავლესობიდან დღეს სამარცხვინოდ მოიქცნენ. მათი თქმით, ხელისუფლებამ ქართველ ხალხს შეურაცხყოფა მიაყენა, როცა კანონპროექტი ჩააგდეს, რაც მაჟორიტარული სისტემის ცვლილებას გულისხმობს. მათივე განცხადებით, ამ ქმედებით ბიძინა ივანიშვილი მმართველობას დაასრულებს.

"საზოგადოება არის შეურაცხყოფილი და ამას არ აპატიებს. ქართველი ერი პროპორციულ არჩევნებს ითხოვს. მოვითხოვთ, რომ ხალხის აზრი იყოს პარლამენტში გატარებული, ეს არის უმნიშვნელოვანესი. ჩვენ არ გავჩერდებით, რადგან ღირსება შელახული ვართ",- განაცხადეს აქციის მონაწილეებმა.

მათი თქმით, პროტესტი გაგრძელდება.