ბრიტანეთში პოპულარული ინტერნეტპორტალ Traveller-ის ჟურნალისტი პაოლა ტოტარო, რომელმაც რეგიონში აჭარის ტურიზმის დეპარტამენტის მოწვევით ზაფხულის ბოლოს იმოგზაურა, ბათუმზე ბლოგში წერს. ამის შესახებ „ინტერპრესნიუსს“ აჭარის ავტონომიური რესპუბლიკის ტურიზმისა და კურორტების დეპარტამენტიდან აცნობეს.

„ახლა კი დავიწყებ თხრობას ჩემი მოგზაურობის შესახებ, რომელიც ერთ-ერთ ყველაზე მომხიბლავ მოკლე დასვენებად იქცა ჩემს სამოგზაურო პრაქტიკაში, თავისი ულამაზესი მთის და ზღვის პეიზაჟებით, ეგზოტიკური სამზარეულოთი და ღვინით, თბილი, კონტაქტური ხალხითა და ძალიან ექსცენტრული ურბანული არქიტექტურით. მე უკვე ვგეგმავ აქ დაბრუნებას, რათა უფრო მეტი ვნახო“, - წერს პაოლა ტოტარო.

ბლოგში ჟურნალისტი ბათუმის არქიტექტურასა და ძირითად ტურისტულ ღირსშესანიშნაოებებზე საუბრობს, ბათუმს კი ლას ვეგასის, იტალიური რენესანსისა და საბჭოთა კავშირის სინთეზს უწოდებს.

ქალაქის ღირსშესანიშნაობებიდან ჟურნალისტი განსაკუთრებულ აქცენტს ბათუმის ბულვარზე აკეთებს, სადაც მკითხველებს სეირნობას მზის ჩასვლისას ურჩევს.

„ბათუმის ბულვარში მზის ჩასვლის დროს გასეირნება ნამდვილი სიამოვნებაა. 1881 წელს, ფრანგი მებაღის, მიხეილ დალფონსის მიერ გაშენებული ტერიტორია სანაპიროს და მცენარეებში ჩაფლულ ალეებს მოიცავს. ყვავილების კასკადებსა და ხეების ჩრდილში კაფეები, ტენისის მაგიდები, რესტორნები და ბავშვთა ატრაქციონებია განთავსებული, დასხედით, მიირთვით აპერიტივი და უცქირეთ ალისფერ, ჩამავალ მზეს“, - წერს ჟურნალისტი.

ბათუმში ყოფნისას ჟურნალისტი ბათუმის ბოტანიკურ ბაღსა და მტირალას ეროვნულ პარკსაც სტუმრობდა, რაც საინტერესოდაა გადმოცემული Traveller-ზე გამოქვეყნებულ ბლოგში.

„ჩვენთვის პირველი დაუვიწყარი სიურპრიზი ბოტანიკური ბაღი იყო, სადაც ზურმუხტისფერი ტერასები კონცხს გადაჰყურებს და ყველა ხედს სეკვოიას, ევროპული წიწვებისა და შავი ზღვის ფონი ახლავს თან“, - წერს ჟურნალისტი და ბოტანიკური ბაღიდან მტირალას ეროვნულ პარკში ინაცვლებს, სადაც ადგილობრივ სამზარეულოზე, ნატურალურ პროდუქტებსა და ველურ ბუნებაზე ამახვილებს ყურადღებას.

ბლოგში ჟურნალისტი ასევე, ეხება რომაელებისა და ბიზანტიელების კვალს ბათუმში და მკითხველებს გონიო-აფსაროსის ციხე-მუზეუმის მონახულებას ურჩევს.

„ადით კედლებზე, საიდანაც არაჩვეულებრივი ხედები იშლება და „ჩაისუნთქეთ“ ისტორია, სანამ მთებში დაბრუნდებით, ჰობიტების სამყაროს მსგავსი, მახუნცეთის თაღოვანი ხიდის სანახავად“, - წერს ჟურნალისტი.

„ბლოგი აჭარაში მოგზაურობისთვის საჭირო პრაქტიკული რჩევებით სრულდება. ის Traveller-ზე შემოდგომის დასაწყისში გამოქვეყნდა.

ბლოგის ბმული იხილეთ - https://www.traveller.com.au/batumi-the-unknown-ancient-port-city-h1hiql?fbclid=IwAR354yliQUPWsJvymTdM2q2VjAECjctUYJdHnk_omYXKlwZQ9v0Umjdm5Qg", - ნათქვამია ინფორმაციაში.