გორის ცენტრში მდებარე ადმინისტრაციულ შენობასთან ხმაურია. აღნიშნულ შენობაში განთავსებულია პარლამენტის მაჟორიტარი დეპუტატის იოსებ მაკრახიძის ბიურო.
„ერთიანი ნაციონალური მოძრაობის” შიდა ქართლის ორგანიზაციის ახალგაზრდული ფრთის წევრებმა აქცია სასტვენების თანხლებით, ჯერ ადმინისტრაციულ შენობასთან გამართეს. ისინი მაკრახიძისგან პარლამენტში პროპორციულ სისტემასთან დაკავშირებით გამართულ კენჭისყრაში მონაწილეობაზე უარის თქმის გამო, პასუხს ითხოვდნენ და საპარლამენტო მანდატის დატოვებისკენ მოუწოდებდნენ.
გორის მაჟორიტარი აქციის მონაწილეებთან არ გამოჩენილა, რის შემდეგაც შეკრებილებმა თავად გადაწყვიტეს შენობაში შესვლა.
ადმინისტრაციული შენობის დაცვის თანამშრომლები მათ შენობაში შესვლის საშუალებას არ აძლევენ. აქციის მონაწილეებმა მათ რამდენიმე წუთი მისცეს შენობაში შესვლის უფლების მისაღებად.
