ბათუმში, „თეთრი ხალათების" აქცია გაიმართა. ექიმები ცხინვალის საოკუპაციო რეჟიმის მიერ უკანონოდ დაკავებული ქართველი ექიმის, ვაჟა გაფრინდაშვილის მხარდასაჭერად შეიკრიბნენ და დე ფაქტო ხელისუფლებას მისი გათავისუფლებისკენ მოუწოდეს.
აქციაზე კლინიკა „მედცენტრის" ექიმები იმყოფებოდნენ.
„ვაჟა გაფრინდაშვილი ჩვენი მეგობარია. მისი საქციელი არის გმირობა. ჩვენ გვეამაყება, რომ ვაჟას მეგობრები და კოლეგები ვართ. ეს არის სწორედ ქვეყნის ინტერესების გამოხატვა და ასეთი საქციელით, ასეთი ერთად დგომით აშენდება ქვეყანა. თავისუფლება ვაჟას, ჯანმრთელობას ვუსურვებთ და გვჯერა, რომ მალე ჩვენს გვერდით იქნება“, - განაცხადა ნევროლოგმა შორენა ვაშაძემ.
ცხინვალის საოკუპაციო რეჟიმის მიერ უკანონოდ დაკავებული ქართველი ექიმის, ვაჟა გაფრინდაშვილის მხარდასაჭერად დღეს „თეთრი ხალათების“ აქცია რამდენიმე ადგილას გაიმართება.