გორის მუნიციპალიტეტის ორი სოფლის, მეჯვრისხევისა და ახალუბნის დამაკავშირებელი გზის რეაბილიტაციას მილიონ ლარზე მეტი მოხმარდა. ამის შესახებ „ინტერპრესნიუსს“ გორის მერიიდან აცნობეს.
ხელშეკრულების მიხედვით, 1 079 419 ლარის ღირებულების სამუშაოები შპს ,,საგზაო სამშენებლო სამმართველო N1”- მა მიმდინარე წლის დეკემბერში უნდა დაასრულოს.
2 384 მეტრი სიგრძის გზის მონაკვეთის რეაბილიტაცია რეგიონალური განვითარების ფონდისა და ადგილობრივი ბიუჯეტის თანადაფინანსებით ხორციელდება.
აღნიშნული პროექტი ერთ-ერთია იმ მასშტაბურ პროექტებს შორის, რომელიც მიმდინარე წელს გორის მუნიციპალიტეტში ხორციელდება. რეაბილიტირებული გზით ხუთი სოფლის მოსახლეობა, 7 000 - მდე ადგილობრივი ისარგებლებს. გზის აღნიშნული მონაკვეთი, გარდა მეჯვისხევისა და ახალუბნისა, ერთმანეთთან აძვს, ჯარიაშენისა და მუმლაანთ კარსაც აკავშირებს.
გზის რეაბილიტაცია რამდენიმე ათეული წელი არ განხორციელებულა. საპროექტო მონაკვეთები წარმოადგენდნენ სასოფლო გზებს, რომლის პარამეტრები დარღვეული იყო. არსებული სანიაღვრე არხები და წყალსატარი კონსტრუქციები იყო მნიშვნელოვნად დაბინძურებული და ვერ ატარებდა ნალექების შედეგად შეგროვილ წყლის რაოდენობას. არსებული გზის საფარი საჭიროებდა კაპიტალურ შეკეთებას. გზის გასწვრივ გაიწმინდა და მოეწყო ახალი სანიაღვრე სისტემაც.