2 წუთი არის საკმარისი იმისთვის, რომ კითხვები დაუსვათ საპატრულო პოლიციის წარმომადგენლებს, ,- ამის შესახებ მოსამართლე ვალერიან ფილიშვილმა თბილისის საქალაქო სასამართლოში 18 ნოემბერს აქციების დროს დაკავებული პირების პროცესის მიმდინარეობისას განაცხადა.
მოსამართლის ეს განცხადება დაკავებულების ადვოკატებმა გააპროტესტეს. ადვოკატების თქმით, ეს არ არის გონივრული ვადა, რაც მათ მოსამართლემ მოწმეებისთვის კითხვების დასასმელად გამოუყო.
როგორც ადვოკატებმა აღნიშნეს, მოსამართლე საპროცესო კანონმდებლობის კონკრეტულ მუხლებს არღვევს. მოსამართლე ვალერიან ფილიშვილმა ადვოკატებს ურჩია, რომ მათთვის მიცემული ვადა გაასაჩივრონ.
ცნობისთვის, თბილისის საქალაქო სასამართლოში 18 ნოემბრის საპროტესტო აქციების დროს დაკავებული 6 პირის სასამართლო პროცესი თითქმის 4-საათიანი დაგვიანებით განახლდა. გიგა მაქარაშვილის, ირაკლი კაჭარავას, დიმიტრი ბიძინაშვილის, ირაკლი ნადირაძის, დავით მჟავანაძისა და პაატა სოსონაშვილის მიმართ გამოძიება ადმინისტრაციული კოდექსის 166-ე და 173-ე მუხლებით მიმდინარეობს, რაც 15 დღით თავისუფლების აღკვეთას ან ფინანსურ სანქციას გულისხმობს. შეგახსენებთ, შსს-ს ინფორმაციით, ადმინისტრაციულ სამართალდარღვევათა კოდექსის 173-ე (სამართალდამცავი ორგანოს თანამშრომლის კანონიერი მოთხოვნისადმი დაუმორჩილებლობა) და 166-ე (ხულიგნობა) მუხლებით გათვალისწინებული სამართალდარღვევისთვის სულ 37 პირია დაკავებული.