დემოკრატიული ჩართულობის ცენტრის (USAID) რუსთავის ოფისში, 2020 წლის რუსთავის ადგილობრივი ბიუჯეტის პროექტის საჯარო განხილვა გაიმართა,- ამის შესახებ „ინტერპრესნიუსს“ რუსთავის მერიიდან აცნობეს.

რუსთავის მერიის საფინანსო-საბიუჯეტო სამსახურის უფროსმა ლევან კავთიაშვილმა დამსწრე საზოგადოებას, 2020 წლის ადგილობრივი ბიუჯეტის პროექტის პრეზენტაცია წარუდგინა. ადგილობრივი ბიუჯეტის ძირითად პრიორიტეტებზე ისაუბრეს საკრებულოს საფინანსო-საბიუჯეტო კომისიის თავმჯდომარე გრიგოლ ვეფხვაძემ და რუსთავის მერის მოადგილე ბესიკ ტოგონიძემ.

ქალაქ რუსთავის მუნიციპალიტეტის მომავალი წლის მთავარი ფინანსური დოკუმენტის განხილვას, რუსთავის საკრებულოს თავმჯდომარის მოადგილე ნინო ქავთარაძე, მერის მოადგილეები - ბესიკ ტოგონიძე და გოჩა ლორია, მოქალაქეები, არასამთავრობო სექტორის, სხვადასხვა სფეროსა და მედიის წარმომადგენლები ესწრებოდნენ.

მუნიციპალიტეტის აღმასრულებელი ორგანოს მიერ წარმოდგენილი პროექტის მიხედვით, მომავალი წლის ბიუჯეტის, როგორც შემოსულობების, ისე გადასახდელების ნაწილი 46 306 004 ლარითაა განსაზღვრული, პრიორიტეტული კი სოციალური, ჯანდაცვის, სკოლამდელი აღზრდის, განათლებისა და ინფრასტრუქტურის სფერეოების დაფინანსება იქნება.

რუსთავის 2020 წლის ბიუჯეტის პროექტის პრეზენტაციის შემდეგ, შეხვედრა კითხვა-პასუხის რეჟიმში წარიმართა. ადგილობრივი თვითმმართველობის წარმომადგენლებმა მოქალაქეების და არასამთავრობო ორგანიზაციების, ასევე მედია საშუალებების წარმომადგენლების შეკითხვებს უპასუხეს.