რუსთავში, მაჟორიტარი დეპუტატის პაატა მხეიძის ბიუროსთან ხმაური იყო. "ევროპული საქართველოს" ადგილობრივი ორგანიზაციის წევრებმა ბოქლომი მიიტანეს და შესასვლელ კარზე დადებას ცდილობდნენ. ოფისთან შეკრებილმა მხეიძის მხარდამჭერებმა, მათ ამის საშუალება არ მისცეს, რა დროსაც მხარეებს შორის სიტყვიერი დაპირისპირება მოხდა.

აქციის დროს ოფისში იმყოფებოდა თავად მაჟორიტარი დეპუტატი. ადგილზე ამ დრომდე მობილიზებულია პოლიცია.

"ევროპული საქართველოს" რუსთავის ორგანიზაციის თავჯდომარის ნინო იმედაშვილის განცხადებით, სხვა დროს მივლენ და ბოქლომს მაინც დაადებენ პაატა მხეიძის ბიუროს ოფისს, ვინაიდან, ის იმ დეპუტატებს შორისაა, ვინც ივანიშვილის ნება შეასრულა და პროპორციულ საარჩევნო სისტემაზე გადასვლას, მხარი არ დაუჭირა.