საზოგადოებრივი მაუწყებლის აჭარის ტელევიზიისა და რადიოს დირექტორი კვლავ ვერ აირჩიეს. პირველი კენჭისყრა უშედეგოდ დასრულდა, რადგან საკმარისი ხმების ვერც ერთმა კანდიდატმა ვერ მიიღო.

განმეორებითი კენჭისყრა რამდენიმე წუთში ჩატარდება. ამ დროისათვის ბორდის წევრებმა შესვენება გამოაცხადეს.

რაც შეეხება კანდიდატებს, ესენი არიან: ნათია ზოიძე, ნათია შავაძე, გიორგი კოხრეიძე, დავით ჩხარტიშვილი, ფირუზ ბოლქვაძე, შოთა გუჯაბიძე, შოთა გურაბანიძე, ლაშა ზარგინავა, მაია მერკვილაძე და შოთა ზოიძე.

შეგახსენებთ, რომ 18 ნოემბერს ქუთაისის სააპელაციო სასამართლომ გააუქმა ბათუმის საქალაქო სასამართლოს გადაწყვეტილება, რომლის მიხედვითაც მაუწყებლის დირექტორის ასარჩევად კონკურსი შეჩერებული იყო. ტელევიზიის ბორდს კონკურსანტმა გიორგი კოხრეიძემ უჩივლა.

როგორც ცნობილია, საზოგადოებრივი მაუწყებლის “აჭარის ტელევიზიისა და რადიოს" ყოფილი დირექტორი ნათია კაპანაძე ბორდის წევრებმა იმპიჩმენტის წესით გაათავისუფლეს.