შეკვეთილში, ბიძინა ივანიშვილის სახლთან „დაბოქლომების” აქცია გაიმართა. ადგილზე მისულ საინიციატივო ჯგუფის წევრებს 30-მდე სამართალდამცველი დახვდა. აქციის მონაწილეებმა ბოქლომი ბიძინა ივანიშვილის სახლის ღობეს დაადეს, რასაც მცირე დაპირისპირება მოჰყვა.

„აქ მოვედით, რომ „დაგვებოქლომებინა“. თითოული მისი ამ შენობიდან გამოსვლა იწვევს ქვეყანაში არეულობას, მინდა იცოდეს ბიძინა ივანიშვილმა, რომ მისი დრო დასრულებულია, მისი ხანა წასულია. გუშინდელი დღე იყო იმის ფაქტი, რომ მას ძალიან ეშინია. გამოიყვანა „ტიტუშკები” , ადმინისტრაციული რესურსი იმისთვის, რომ ხელი შეეშალა ჩვენი მშვიდობიანი აქციებისთვის. დღეს ბიძინა ივანიშვილის რეზიდენცია „დაბოქლომდა“. ხვალ ,,საინიციატივო ჯგუფი” „დააბოქლომებს“ ყველა ადმინისტრაციულ შენობას და ასე გაგრძელდება მანამ, სანამ ის არ მოცილდება საქართველოს.

ადგილზე მოსულებს დაგხვდა პოლიცია, ისინი იცავენ კერძო საკუთრებას და გვიშლიდნენ მშვიდობიანი გამოხატვის უფლებას. არ გვაძლევდნენ სტიკერების გაკვრის უფლებას და ამ ბოქლომის დამაგრებას დიდი ძალისხმევა დასჭირდა”, - განაცხადა საინიციატივო ჯგუფის” წევრმა ანზორ გუბაევმა.