ქალაქ კასპში ევროპული სტანდარტების ფეხბურთის სტადიონი კასპის მაჟორიტარმა დეპუტატმა ირაკლი მეზურნიშვილმა და ფეხბურთის ფედერაციის პრეზიდენტმა ლევან კობიაშვილმა გახსნეს.
„ ათეული წლებია კასპის საფეხბურთო სტადიონი სარეაბილიტაციო იყო და შესაბამისად, მუნიციპალიტეტს აღარც უფროსების გუნდი „განთიადი“ ჰყავდა. საფეხბურთო სკოლაში, რომელიც ასევე სრულად გარემონტდა იზრდებიან პერსპექტიული ფეხბურთელები, თუმცა ადგილობრივი გუნდის არარსებობის გამო ყველა ვერ აგრძელებდა თამაშს სხვა გუნდებში.
სპორტსმენებმა და მაყურებლებმა უნიკალური საჩუქარი მიიღეს, რომელიც მუნიციპალური განვითარების ფონდის, ფეხბურთის ფედერაციის და კასპის ადგილობრივი ბიუჯეტით დაფინანსდა“, - ნათქვამია კასპის მუნიციპალიტეტის მიერ გავრცელებულ ინფორმაციაში.
სტადიონის გახსნა მაყურებელს მიულოცეს ლევან კობიაშვილმა, ირაკლი მეზურნიშვილმა (პროექტის ინიციატორი), შიდა ქართლის გუბერნატორმა გიორგი ხოჯევანიშვილმა, კასპის მერმა მანუჩარ მერებაშვილმა, დეპუტატმა შოთა ყავლაშვილმა, ცნობილმა კომენტატორმა ჯამლეტ ხუხაშვილმა.
„ეს დღე ნამდვილი სპორტული ზეიმი იყო, რომელიც თბილისის „დინამოს“ და კასპის „განთიადის“ ვეტერან ფეხბურთელთა ამხანაგური მატჩითა და ულამაზესი ფოიერვერკით დასრულდა“, - აცხადებენ კასპის მუნიციპალიტეტის მერიაში.