მიხეილ ჩხენკელი და იაპონიის განათლების, კულტურის, სპორტის, მეცნიერებისა და ტექნოლოგიების მინისტრი სამომავლო თანამშრომლობაზე შეთანხმდნენ

ოფიციალური ვიზიტით იაპონიაში მყოფი საქართველოს განათლების, მეცნიერების, კულტურისა და სპორტის მინისტრი მიხეილ ჩხენკელი იაპონიის განათლების, კულტურის, სპორტის, მეცნიერებისა და ტექნოლოგიების მინისტრს, ჰაგიუდა კოიჩის შეხვდა. საქართველოს განათლების, მეცნიერების, კულტურისა და სპორტის სამინისტროს ინფორმაციით, შეხვედრაზე მინისტრებმა მომავალი თანამშრომლობის დეტალები განიხილეს.„ჰაგიუდა კიოჩიმ მიხეილ ჩხენკელს წარმატება უსურვა და აღნიშნა, რომ საქართველოსა და იაპონიას შორის თანამშრომლობას უდიდესი პოტენციალი გააჩნია, მათ შორის ქართველი მეცნიერების, პროფესორებისა და სტუდენტების გაცვლითი პროგრამების შემუშავების კუთხით. იაპონიის განათლების, კულტურის, სპორტის, მეცნიერებისა და ტექნოლოგიების მინისტრმა ჰაგიუდა კოიჩიმ ხაზი გაუსვა იაპონიაში ქართული ღვინისა და ქართველი სპორტსმენების - მორაგბეების, ტოჩინოშინისა და გაგამარუს პოპულარობას.მიხეილ ჩხენკელმა იაპონურ მხარეს მადლობა გადაუხადა მასპინძლობისთვის და საქართველოს განათლების სისტემაში მიმდინარე რეფორმები გააცნო. მინისტრმა ქუთაისის საერთაშორისო უნივერსიტეტის მნიშვნელობაზეც ისაუბრა, რომელიც მომავალ წელს ფუნქციონირებას დაიწყებს. ამ მიმართულებით, მიხეილ ჩხენკელმა მასპინძელ მხარეს იაპონიის წამყვანი უნივერსიტეტების პროფესორების ქუთაისის საერთაშორისო უნივერსიტეტის აკადემიურ და სამეცნიერო საქმიანობაში ჩართვა შესთავაზა.შეხვედრის დასასრულს, მინისტრებმა იმედი გამოთქვეს, რომ აქტიური თანამშრომლობით, მხარეები სამომავლოდ მრავალ პროექტს განახორციელებენ”, - ნათქვამია ინფორმაციაში.

ზაზა ფირალიშვილი - არ ჩანს დიდი იდეა, არ ჩანან პოლიტიკური აქტორები, რომლებიც თავისი გადამდები ენთუზიაზმით და ენერგიით „აამოძრავებდნენ“ საზოგადოებას
თორნიკე ჯანაშვილი - “რეფორმერი" პოლიტიკაში მოდის
ქართული პრესის მიმოხილვა 13.07.2020
ალექსეი მალაშენკო - ვინც არ უნდა მოიგოს საქართველოს არჩევნებში, აფხაზეთისა და სამხრეთ ოსეთის საკითხებში არაფერი შეიცვლება, ამიტომ, კრემლისთვის პრინციპული მნიშვნელობა არ აქვს, ვინ გაიმარჯვებს
ყაზახეთ-საქართველოს თანამშრომლობის ახალი ეტაპი იწყება
სუბსიდირებული იპოთეკური სესხი - ახალი შესაძლებლობა ტერაბანკისგან
სილქნეტის მობილური აბონენტები თიბისის მობაილბანკით სარგებლობას ინტერნეტის დახარჯვის გარეშე შეძლებენ