პარლამენტი საქმიანობას გააგრძელებს ჩვეულ რეჟიმში, სამართალდამცავი ორგანოები გააგრძელებენ თავის საქმეს და არასდროს დადგება ის დრო საქართველოში, როცა „ნაცმოძრაობის“ და მათი დანაყოფების გადასაწყვეტი იქნება რომელიმე საკითხი, - ამის შესახებ საპარლამენტო უმრავლესობის ლიდერმა, მამუკა მდინარაძემ ჟურნალისტებთან განაცხადა.

მისივე თქმით, ოპოზიციამ რამდენჯერაც სცადა პლენარული სესიის ჩაშლა და პარლამენტის ბლოკირება, იმდენჯერ „წააგეს იმ შერკინებაში, სადაც აბსოლუტურად ძალით გააჩინეს ქარიშხალი ჭიქაში." მამუკა მდინარაძე ამბობს, რომ გარკვეული უხერხული მომენტი იქმნება, „მაგრამ ეს ნამცეცია იმასთან შედარებით, თუ სახელმწიფო ინსტიტუტების ფუნქციონირებას საფრთხე შეექმნება“.

„არ იმოქმედებს არც მათი უპასუხისმგებლო ქცევები ქუჩაში და არც ბოკერიას მუქარები, რომელიც იყო პოლიციელის მიმართ. ძალიან ცუდი კადრები ვნახეთ, აგონიაში ჩავარდნილი ადამიანის რეაქცია პოლიციელის პრინციპულ, ძლიერ და ჰუმანურ მოქმედებაზე. ეუბნებიან პოლიციელს, რომ იმახსოვრებენ, რაც არ უნდა დაიმახსოვრონ, არასდროს დადგება ის დრო საქართველოში, როცა „ნაცმოძრაობის“ და მათი დანაყოფების გადასაწყვეტი იქნება რომელიმე საკითხი“, - აცხადებს მამუკა მდინარაძე.