როცა დეპუტატს უზღუდავენ თავისუფალი გადაადგილების, საქმიანობის განხორციელების საშუალებას, ყველას მინდა შევახსენო, რომ ეს არის დასჯადი ქმედება, - ამის შესახებ იურიდიულ საკითხთა კომიტეტის თავმჯდომარემ, ანრი ოხანაშვილმა ჟურნალისტებთან განაცხადა, რითაც გამოეხმაურა გურამ მაჭარაშვილთან დაკავშირებულ ინციდენტს და აღნიშნა, რომ ეს უკვე მეორე შემთხვევაა, რომელიც ცივილური გამოხატვის ფარგლებს სცილდება.
დეპუტატი ამბობს, რომ მსგავსი ქმედებების ფონზე რთულია დიალოგისთვის რესურსი მოინახოს.
"უკვე მეორედ მოხდა ფაქტი - ერთ შეთხვევაში მერაბ ქვარაიას, მეორე შემთხვევაში კი გურამ მაჭარაშვილს არ მისცეს პრესკონფერენციის ჩატარების შესაძლებლობა. აზრის და გამოხატვის უფლება ჩვენს ქვეყანაში დაცულია. თუკი ვინმეს არ მიაჩნია ბატონი გურამის ან ბატონი მერაბის პოზიცია სწორად, შეუძლიათ გააკრიტიკონ, ეს შეიძლება გამოხატონ ხმამაღლა, ხმაურით, მაგრამ როცა ისინი უზღუდავენ თავისუფალი გადაადგილების, მისი საქმიანობის განხორციელების საშუალებას დეპუტატს, ყველას მინდა შევახსენო, რომ ეს არის დასჯადი ქმედება და ამ ყველაფერზე შესაძლებელია მოხდეს სამართლებრივი რეაგირება“, - განაცხადა ანრი ოხანაშვილმა.
შეგახსენებთ, რომ მაჟორიტარ დეპუტატ გურამ მაჭარაშვილს დღეს მოძრაობა „გაბედეს“ წევრებმა პრესკონფერენციის ჩატარების საშუალება არ მისცეს და ის პრესკლუბიდან პოლიციის დახმარებით გაიყვანეს. ანალოგიური მოხდა გასულ კვირას მაჟორიტარი დეპუტატის, მერაბ ქვარაიას შემთხვევაშიც.