ბათუმის საკრებულოს "ერთიანი ნაციონალური მოძრაობის" წევრები ბოიკოტს აცხადებენ და სხდომებზე დასწრებას არ აპირებენ.

როგორც "ერთიანი ნაციონალური მოძრაობის" წევრმა ლევან ანთაძემ განაცხადა, ისინი პროპორციულ საარჩევნო სისტემას ითხოვენ და ვიდრე მოთხოვნა არ დაკმაყოფილდება, საკრებულოს სხდომებზე არ გამოცხადდებიან.

მისივე ინფორმაციით, ბათუმის საკრებულოში "ერთიანი ნაციონალური მოძრაობა" მხოლოდ 2020 ბიუჯეტის პროექტის განხილვას დაესწრება.

"ბათუმის საკრებულოში სხდომებს ჩვენ აღარ დავესწრებით იქამდე, სანამ არ გადაწყდება ქვეყნის უმნიშვნელოვანესი საკითხი - არჩევნების პროპორციული საარჩევნო სისტემით ჩატარება. ფაქტობრივად ბოიკოტის რეჟიმში გადავდივართ, სანამ ეს პროცესები ქვეყანაში ხალხის სასარგებლოდ არ დალაგდება", - განაცხადა ლევან ანთაძემ.

დღეს, 11:00 საათზე ბათუმის საკრებულოში მორიგი სხდომაა ჩანიშნული.