პარლამენტის ვიცე-სპიკერად უმრავლესობის წევრი კახა კუჭავა აირჩიეს. აღნიშნულ თანამდებობაზე კუჭავას არჩევის შესახებ დადგენილებას 83-მა დეპუტატმა დაუჭირა მხარი. ამასთან, ამავე დადგენილებით, მას ვადაზე ადრე შეუწყდა გარემოს დაცვისა და ბუნებრივი რესურსების კომიტეტის თავმჯდომარის უფლებამოსილება.

გარდა ამისა, პარლამენტმა 81 ხმით მხარი დაუჭირა უმრავლესობის წევრის გურამ მაჭარაშვილის საპროცედურო საკითხთა და წესების კომიტეტის თავმჯდომარედ არჩევას. მანამდე მაჭარაშვილი იურიდიულ საკითხთა კომიტეტის წევრი და აღნიშნული კომიტეტის თავმჯდომარის მოადგილე იყო.

შეგახსენებთ, რომ პარლამენტში ახალი საკადრო გადაწყვეტილებების მიღების საჭიროება მას შემდეგ დადგა, რაც 14 ნოემბრის კენჭისყრის შემდეგ საპარლამენტო უმრავლესობის რიგები 12-მა დეპუტატმა დატოვა.