დედაქალაქის მერის, კახა კალაძის განცხადებით, ყველა ადამიანს აქვს უფლება პროტესტის გამოხატვის, თუმცა მხოლოდ კანონის ფარგლებში. ამის შესახებ კალაძემ ჟურნალისტებთან საუბრისას მიმდინარე პილიტიკური მოვლენების შეფასებისას განაცხადა.
კალაძე ოპოზიციას კონსტრუქციულობისკენ მოუწოდებს.
„ეს დისკომფორტი არ არის ჩვენთვის, რადგან არსებობენ ადამიანები, ვისაც აქვთ განსხვავებული მოსაზრება. ყველას ერთნაირი მიდგომა და დამოკიდებულება კონკრეტულ საკითხებზე ვერ გვექნება. მთავარია ჩვენი ქვეყნის ინტერესებიდან გამომდინარე შენარჩუნდეს სიმშვიდე. ოპოზიციას მოვუწოდებ კონსტრუქციულობისკენ. პირველ რიგში, ეს აზიანებთ მათ და მათ ინტერესებს”,- განაცხადა კალაძემ.
მისი თქმით, პარლამენტის ბლოკირება სისხლის სამართლის დანაშაულია და საკანონმდებლო ორგანოსთან პოლიციის მობილიზების მიზანია, რომ გარკვეული დაპირისპირებები თავიდან იქნას აცილებული.
„პოლიციის მობილიზება არის მიმართული იმისკენ, რომ მოხდეს პრევენცია და თავიდან იქნას აცილებული დაპირისპირება.
ჩვენ ვიცით მათი ქმედებები, ესაა კანონიდან გადახვევა, ბლოკირება. პარლამენტის ბლოკირება არის სისხლის სამართლის დანაშაული. მათი მიზანია, რომ მოხდეს შეხლა-შემოხლა, დაპირისპირება. ყველანაირ მშვიდობიან და კანონიერ ფორმას სცდება ბლოკირება”,- განაცხადა კალაძემ.