ზესტაფონის მუნიციპალიტეტის მერია ცხოვრების ჯანსაღი წესის განვითარება - პოპულარიზაციისთვის სპორტული ინფრასტრუქტურის მოწყობის სამუშაოებს აქტიურად ახორციელებს.
როგორც „ინტერპრესნიუსს“ ზესტაფონის მუნიციპალიტეტიდან აცნობეს, მუნიციპალიტეტში 8 საფეხბურთო მოედნის მოწყობის სამუშაოები მიმდინარეობს.
„4 სრულიად ახალი სტადიონის მშენებლობა ქალაქის N4, N5, N6 და N 7 საჯარო სკოლებში ხორციელდება. სასწავლო დაწესებულებებს, წლების განმავლობაში არ ჰქონიათ სპორტული მოედნები. პროექტის მიხედვით, მოედნებზე ხელოვნური საფარი დაიგება და შესაბამისი ინვენტარი განთავსდება. სკოლებში სტადიონების მოწყობის სამუშაოები რეგიონული განვითარების ფონდის ფინანსური მხარდაჭერით ხორციელდება, რაზეც 306010 ლარი დაიხარჯება.
ადგილობრივი ბიუჯეტის დაფინანსებით, 4 სპორტული მოედნის რეაბილიტაცია მიმდინარეობს ასევე ქალაქის სხვადასხვა მისამართზე. სოფელ მარტოთუბანში კი ავღანეთში გმირულად დაღუპული სამხედრო მოსამსახურის, მდინარი ბებიაშვილის სახელობის საფეხბურთო მოედნი შენდება. სტადიონების რეაბილიტაციისთვის ადგილობრივი ბიუჯეტიდან 131 218 ლარი იხარჯება. სპორტული ინფრასტრუქტურის მოწყობის ფარგლებში, მუნიციპალიტეტის დაკვეთით, ქალაქის 5 სხვადასხვა ლოკაციაზე, სავარჯიშო ზონა მოეწყობა, სადაც ტრენაჟორები განთავსდება. საფეხბურთო მოედნების მშენებლობა - რეაბილიტაცია 2019 წლის დეკემბრის ბოლოს დასრულდება“,- აღნიშნულია ინფორმაციაში.