ეს არის საქმე, რომელმაც მთლიანად გააშიშვლა საქართველოს მართლმსაჯულება, საგამოძიებო სისტემა და ძალიან ბევრი კითხვის ნიშანი გაგვიჩინა ყველა მათ მიერ წარმოებულ საქმესთან დაკავშირებით,- ამის შესახებ ჟურნალისტებს ზაზა სარალიძის ადვოკატმა ნესტან ლონდარიძემ განუცხადა.

მისივე თქმით, მიუხედავად იმისა, რომ დღეს გამოძიება ყველა საჭირო კითხვას სვამს, პრობლემაა, რომ თავის დროზე არ ჩატარდა ბევრი საგამოძიებო მოქმედება, მაგალითად, ბავშვების მიმოწერასთან, ფარდულთან დაკავშირებით.

,,2 წელი შესრულდა ამ ტრაგედიიდან, ტრაგედიიდან, რომელიც გასცდა ერთი კონკრეტული ოჯახის ფარგლებს და მთელი ქვეყნისთვის გახდა ტრაგედია. ეს არის საქმე, რომელმაც მთლიანად გააშიშვლა საქართველოს მართლმსაჯულება, საგამოძიებო სისტემა და ძალიან ბევრი კითხვის ნიშანი გაგვიჩინა ყველა მათ მიერ წარმოებულ საქმესთან დაკავშირებით. სწორედ ამიტომ არის მნიშვნელოვანი, რომ ამ საქმეზე არ დარჩეს არც ერთი კითხვის ნიშანი და პასუხი გაეცეს ყველა კითხვას, მათ შორის სამოხელეო დანაშაულზე, რომელიც არის ყველაზე მნიშვნელოვანი ამ ეტაპზე და არის განმსაზღვრელი იმის თუ რა ეტაპზე გვაქვს დღეს საქმე. დავადასტურებ, რომ კითხვის ნიშნები ახლა წარმოებულ საქმესთან დაკავშირებით არ გვაქვს, თუმცა, არის ძალიან ბევრი საგამოძიებო მოქმედება, რომელიც აღარ გამოსწორდება, ვეღარ ჩატარდება და ეს არის დიდი მინუსი საქმისთვის,- განაცხადა ნესტან ლონდარიძემ.