ქობულეთის მერი - „ნაცმოძრაობას“ არეულობის საშუალებას არ მივცემთ

ქობულეთის მერიაში "ერთიანი ნაციონალური მოძრაობის" წევრებსა და მერის მირიან ქათამაძეს შორის შეხვედრა დასრულდა. როგორც მირიან ქათამაძემ განაცხადა, „ერთიანი ნაციონალური მოძრაობა" ქობულეთის მუნიციპალიტეტის ორგანოს ვერ აიძულებს, რომ ოპოზიციის დღის წესრიგით იმოქმედონ. მისივე თქმით, ოპოზიციის მცირე ჯგუფი ქობულეთის მერიის პარალიზებას ვერ მოახდენს.

"ნაციონალური მოძრაობის" წევრები ცდილობენ ფსიქოლოგიურ, სიტყვიერ და ფიზიკურ ზეწოლას, ეს მათი პოლიტიკური საქმიანობის მეთოდია. მე საჯარო უწყების ხელმძღვანელი ვარ და კანონით მევალება უზრუნველვყო წესრიგი. „ნაციონალურ მოძრაობას“ არეულობის საშუალებას არ მივცემთ",- აღნიშნა მირიან ქათამაძემ.

თავის მხრივ, ელგუჯა ბაგრატიონი ამბობს, რომ ქობულეთის მერთან დიალოგი რთულია და ვერანაირ შეთანხმებას ვერ მიაღწიეს.

„ქობულეთის საკრებულოს წევრებს უფლება აქვთ, სამუშაო ოთახში შევიდნენ ნებისმიერ დროს. მერს თმენის ვალდებულება აქვს და ვერ აცნობიერებს. იგივე მეთოდებით გავაგრძელებთ პროტესტს, რადგან კანონს არ ვარღვევთ",- განაცხადა ელგუჯა ბაგრატიონმა.

დღეს „ქართული ოცნების“ და „ნაციონალური მოძრაობის“ წევრებს შორის დაპირისპირება რამდენჯერმე მოხდა, ფრაქცია "ერთიანი ნაციონალური მოძრაობის" წევრები ქობულეთის საკრებულოში შესვლას ითხოვდნენ.