ჩხოროწყუში, მამაკაცის გაუპატიურების ბრალდებით დაკავებულ პოლიციელს ზუგდიდის რაიონულმა სასამართლომ აღკვეთის სახით პატიმრობა შეუფარდა, რითაც პროკურატურის შუამდგომლობა სრულად დაკმაყოფილდა. პროცესი მედიისთვის დახურული იყო.

სხდომის დასრულების შემდეგ ბრალდებულის ადვოკატმა სოსო ჯალაღონიამ ჟურნალისტებს განუცხადა, რომ დაკავებული ბრალს არ აღიარებს და მოსამართლის გადაწყვეტილებას გაასაჩივრებს. მისივე თქმით, ბრალდების მხარეს უნდა დაესაბუთებინა პატიმრობის მიზანშეწონილობა, თუმცა მან ეს ვერ მოახერხა.

საქმესთან დაკავშირებით სხვა დეტალებზე არ უსაბრია არც ბრალდებულის და არც დაზარალებულის უფლებადამცველებს.

მამაკაცს, რომელიც პოლიციელს გაუპატიურებაში ადანაშაულებს, ახალგაზრდა იურისტთა ასოციაციის იურისტი ჯანო ჭკადუა იცავს. ჩხოროწყუში პოლიციელი მამაკაცის გაუპატიურების ბრალდებით, მოსამართლის განჩინებით, დააკავეს. ფაქტზე გამოძიება 137-ე მუხლის პირველი ნაწილით მიმდინარეობს, რაც გაუპატიურებას გულისხმობს.