რუხი-რიყე-ტყაია-პალურის დამაკავშირებელი საავტომობილო გზის მშენებლობა აქტიურ რეჟიმში მიმდინარეობს. ამის შესახებ „ინტერპრესნიუსს“ სამეგრელო-ზემო სვანეთის სახელმწიფო რწმუნებულის პრესსამსახურიდან აცნობეს.

მათი ინფორმაციით, სამშენებლო პროცესს სამეგრელო-ზემო სვანეთის სახელმწიფო რწმუნებული ალექსანდრე მოწერელია, ზუგდიდის მერთან გიორგი შენგელიასთან ერთად გაეცნო. ახალი გზა ერთმანეთს ზუგდიდის და წალენჯიხის მუნიციპალიტეტებს აკავშირებს.

„ამ ეტაპზე, აღნიშნული გზის მონაკვეთზე იგება ბეტონის საფარი და ეწყობა სანიაღვრე არხები. პროექტის მიხედვით ახალი გზა 10,3 კილომეტრზე დაიგება.

რუხი-რიყე-ტყაია-პალურის დამაკავშირებელი გზა თითქმის 30 წელი ავარიულ მდგომარეობაში იყო და ადგილობრივებს გადაადგილების დროს პრობლემას უქმნიდა", - აღნიშნულია ინფორმაციაში.

პროექტს საქართველოს საავტომობილო გზების დეპარტამენტი ახორციელებს და მისი ღირებულება 5 მილიონ ლარზე მეტია. სამუშაოებს კი "პრაიმ ბეტონი" ახორციელებს.