პრინციპულები ვართ, ერთიანები ვართ და ბოლომდე შეუპოვრები - ამის შესახებ „ახალი საქართველოს“ ლიდერმა გიორგი ვაშაძემ მედიას ოპოზიციური პოლიტიკური პარტიების შეხვედრის დასრულების შემდეგ განუცხადა.

გიორგი ვაშაძის თქმით, საპროტესტო აქციები გაგრძელდება.

„ქართული ოცნება“ მთლიანად გადმოვიდა ჩვენს განრიგზე - ოთხშაბათს გააუქმეს მოსამართლეთა კომიტეტი ანუ მოსამართლეთა დამტკიცება არ იქნება ოთხშაბათს კომიტეტზე, გადადეს ხუთშაბათისთვის. პიკეტირება მაშინ იქნება როცა მოსამართლეთა საკითხის განხილვა იქნება, იმიტომ რომ ეს ჩვენთვის გადამწყვეტი მნიშვნელობის თემაა. ჩვენ გვექნება რეგიონებში მწვავე რეაქციები, ყველგან აბსოლუტურად.

რაც შეეხება 14 დეკემბერს დაგეგმილ ღონისძიებას, ვერ გავიგეთ, რა ღონისძიებას მართავს. საჯარო მოხელეების იძულებით ჩამოყვანა უნდა „ქართულ ოცნებას“. ჩვენ ნამდვილად არ შევალთ იმავე კონტრაქციებში და იმავე სისულეებში, რასაც თვითონ მოქმედებენ. მთავარი არის ერთი რამ და საქართველოს თითოეულმა მოქალაქემ გვინდა რომ იცოდეს, ჩვენ გვაქვს სამოქმედო გეგმა , რომლითაც ვმოქმედებთ. „ქართული ოცნება“ რეაგირებს ჩვენს სამოქმედო გეგმაზე. მცირე ცვლილებებს იწვევს ხოლმე მათი პარლამენტის სესიის გაუქმება, კომიტეტის გაუქმება, გადადება. ჩვენი მიზანიც ეს არის, რომ ვაჩვენოთ მსოფლიოს, ვისთან გვაქვს საქმე“, - განაცხადა გიორგი ვაშაძემ.