კემბრიჯის შეფასების საერთაშორისო ცენტრის წარმომადგენელმა ჰიუ ბეიტმანმა შეფასებისა და გამოცდების ეროვნული ცენტრის თანამშრომლებისათვის სამუშაო შეხვედრა გამართა.
როგორც „ინტერპრესნიუსს“ შეფასებისა და გამოცდების ეროვნული ცენტრიდან აცნობეს, ვიზიტის ფარგლებში, შეფასების ექსპერტი ცენტრის საგნობრივი და კვლევის ჯგუფის წევრებს შეხვდა და მათ ტესტების შექმნის უახლეს მიდგომებსა და ტენდენციებზე ესაუბრა. ჰიუ ბეიტმანმა საერთაშორისო გამოცდილებაზეც გაამახვილა ყურადღება.
შეფასებისა და გამოცდების ეროვნულ ცენტრში საკონსულტაციო ტიპის შეხვედრები მუდმივად იმართება. განათლების ადგილობრივ ექსპერტებთან და უმაღლესი სასწავლებლების წარმომადგენლებთან კონსულტაციების შემდეგ, ამ პროცესში საერთაშორისო ექსპერტებიც ჩაერთვებიან. კემბრიჯის შეფასების საერთაშორისო ცენტრის წარმომადგენლები საქართველოში კოლეგებთან სამუშაო შეხვედრებს მომავალშიც გამართავენ.