„ევროპული საქართველო“ - მოსამართლეობის 20 კანდიდატიდან მხოლოდ 2 კანდიდატი აკმაყოფილებს უზენაესი სასამართლოს მოსამართლეობის სტანდარტს

„ევროპული საქართველოს“ შემუშავებული კრიტერიუმების მიხედვით წარმოდგენილი მოსამართლეობის 20 კანდიდატიდან უზენაესი სასამართლოს მოსამართლეობის სტანდარტს მხოლოდ 2 კანდიდატი აკმაყოფილებს. ამის შესახებ „ინტერპრესნიუსს“ „ევროპული საქართველოდან“ აცნობეს. მათივე ინფორმაციით, მოსამართლეობის მინიმალურ სტანდარტს კი 8 მოსამართლე აკმაყოფილებს.

„საქართველოს პარლამენტის წევრებმა “ევროპული საქართველოდან” საკანონმდებლო ორგანოში უზენაესი სასამართლოს მოსამართლეების განხილვის დაწყებიდან კრიტერიუმები შეიმუშავეს, რითაც კანდიდატთა კომპეტენტურობას, კეთილსინდისიერებასა და ზოგად განათლებას/ფასეულობებს აფასებენ. მიუხედავად იმისა, რომ ევროპული საქართველოს წევრები არ აპირებენ პარლამენტში დაგეგმილ საბოლოო კენჭისყრაში მონაწილეობის მიღებას, საზოგადოების ინტერესიდან გამომდინარე, ვაქვეყნებთ ამ შეფასების საბოლოო შედეგებს. სამწუხაროდ, ხელისუფლებამ ყოველგვარი კრიტერიუმისა და შეფასების წინასწარ ცნობილი წესის გარეშე გადაწყვიტა უზენაეს სასამართლოში მოსამართლეთა სამუდამოდ გამწესება“,-ნათქვამია ინფორმაციაში.

პარტიის ინფორმაციით, „ევროპული საქართველო“ უზენაესი სასამართლოს მოსამართლეობის თითოეულ კანდიდატს სამი კრიტერიუმის საფუძველზე აფასებს: კომპეტენტურობა, კეთილსინდისიერება და ზოგადი განათლება/ფასეულობები. აღნიშნული შეფასების ქულათა სისტემა კი გულისხმობს თითოეული კანდიდატის 10 ქულიანი სისტემით შეფასებას.

„წარმოდგენილი მოსამართლეობის 20 კანდიდატიდან მხოლოდ 2 კანდიდატი აკმაყოფილებს უზენაესი სასამართლოს მოსამართლეობის სტანდარტს. ესენი არიან თამარ ზამბახიძე და ალექსანდრე წულაძე.

ამასთან, წარმოდგენილი მოსამართლეობის 20 კანდიდატიდან 8 მათგანი მოსამართლეობის მინიმალურ სტანდარტს აკმაყოფილებს, მაგრამ ვერ აკმაყოფილებს უზენაესი სასამართლოს მოსამართლეობის სტანდარტს. ესენი არიან შოთა გეწაძე, მაია ვაჩაძე, ქეთევან ცინცაძე, გოჩა ჯეირანაშვილი, ლევან მიქაბერიძე, გიორგი მიქაუტაძე, ნუგზარ სხირტლაძე, ლალი ფაფიაშვილი. ზემოთ აღნიშნულ თითოეულ კრიტერიუმში მიღებული შეფასებების მიხედვით თითოეული კანდიდატის საშუალო ქულა 4-დან 7-მდე მერყეობს.

დარჩენილი 10 კანდიდატი მოსამართლეობის მინიმალურ სტანდარტსაც კი ვერ აკმაყოფილებს, რადგან თითოეულ კრიტერიუმში მიღებული შეფასებების მიხედვით თითოეული მათგანის საშუალო ქულა 1-დან 3-მდე მერყეობს. ესენი არიან: თამარ ალანია, მერაბ გაბინაშვილი, მირანდა ერემაძე, მამუკა ვასაძე, შალვა თადუმაძე, ზაზა თავაძე, ვლადიმერ კაკაბაძე, ნინო ქადაგიძე, ლაშა ქოჩიაშვილი, პაატა სილაგაძე“,-ნათქვამია ინფორმაციაში.

ზაზა ფირალიშვილი - არ ჩანს დიდი იდეა, არ ჩანან პოლიტიკური აქტორები, რომლებიც თავისი გადამდები ენთუზიაზმით და ენერგიით „აამოძრავებდნენ“ საზოგადოებას
თორნიკე ჯანაშვილი - “რეფორმერი" პოლიტიკაში მოდის
ქართული პრესის მიმოხილვა 14.07.2020
ალექსეი მალაშენკო - ვინც არ უნდა მოიგოს საქართველოს არჩევნებში, აფხაზეთისა და სამხრეთ ოსეთის საკითხებში არაფერი შეიცვლება, ამიტომ, კრემლისთვის პრინციპული მნიშვნელობა არ აქვს, ვინ გაიმარჯვებს
ტერაბანკის ინოვაციური ბოტის საკომუნიკაციო კამპანიამ საერთაშორისო აღიარება მოიპოვა