პარლამენტის ყველა შესასვლელთან ოპოზიციის წარმომადგენლები და მათი მხარდამჭერები იმყოფებიან. ადგილზე ასევე მობილიზებულია საპატრულო პოლიცია.
როგორც „ინტერპრესნიუსს“ „ნაციონალური მოძრაობის" წევრმა, გიორგი ბარამიძემ პარლამენტთან განუცხადა, ოპოზიციის ამოცანაა, რომ დღეს „ქართული ოცნების" დეპუტატებს მაქსიმალური დისკომფორტი შეუქმნან.
მისივე თქმით, პროტესტი არ დასრულდება, ვიდრე მათი მოთხოვნა არ დაკმაყოფილდება.
ამასთან, ბარამიძე მიიჩნევს, რომ იუსტიციის უმაღლესი საბჭოს მიერ პარლამენტში წარდგენილი მოსამართლეობის კანდიდატთა სია არ უნდა დამტკიცდეს.
„ჩვენი ამოცანაა, რომ მაქსიმალური დისკომფორტი შევუქმნათ იმ დეპუტატებს, რათა იგრძნონ, რომ ასე უნამუსოდ მოქცევა არ შეიძლება, რაც ეხება მნიშვნელოვან საკითხს, საქართველოში მოსამართლეების უვადოდ დანიშვნას და რასაც ახლა აპირებს ივანიშვილის რეჟიმი, „კლანის" მიერ შერჩეული სიის მიხედვით. ეს იმისთვის ხდება, რომ ეს მოსამართლეები თოკზე ჰყავდეს გამობმული და რასაც ეტყვის, ამა თუ იმ საქმეზე ის ბრძანებები შეასრულოს. ჩვენ გვინდა, რომ ეს ბრძანებები ამ ქვეყანაში დასრულდეს", - განაცხადა ბარამიძემ.