როდესაც ძალაშია სასამართლოს გადაწყვეტილება პირის მხრიდან ჩადენილი დანაშაულის შესახებ, ესაა პირდაპირი საფუძველი, რომ მას უფლებამოსილება შეუწყდეს, - ამის შესახებ პარლამენტის თავმჯდომარემ, არჩილ თალაკვაძემ ჟურნალისტებს ნიკა მელიას უფლებამოსილების ვადამდე ადრე შეწყვეტასთან დაკავშირებით განუცხადა, რასაც დღეს პლენარულ სხდომაზე კენჭი უნდა უყარონ.
თალაკვაძე აცხადებს, რომ კანონის თანახმად, როგორც კი ძალაში შედის გამამტყუნებელი განაჩენი, პარლამენტის წევრს უფლებამოსილება უწყდება. მისივე თქმით, თუ სასამართლოს შემდგომი ინსტანციები სხვა გადაწყვეტილებას მიიღებენ, ნიკა მელიას უფლება აქვს პარლამენტს დაუკავშირდეს და ეს ინფორმაცია მიაწოდოს.
„საქართველოს კონსტიტუცია და კანონები პირდაპირ ითვალისწინებს, რომ როდესაც ძალაშია სასამართლოს გადაწყვეტილება პირის მხრიდან ჩადენილი დანაშაულის შესახებ, ესაა პირდაპირი საფუძველი, რომ მას უფლებამოსილება შეუწყდეს, შესაბამისად, სხვა არჩევანი განხილვისთვის აქ არ არსებობს. საპროცედურო კომიტეტმა ეს განიხილა, გადასცა პლენარულ სხდომას და როგორც კი სხდომა განახლდება, კენჭი ეყრება ამ საკითხს“,- აღნიშნა თალაკვაძემ.
შეგახსენებთ, რომ „ნაციონალური მოძრაობის“ წევრის ნიკა მელიას მიმართ უფლებამოსილების შეწყვეტის საკითხი საპროცედურო საკითხთა კომიტეტმა დღეს, სასამართლოს გადაწყვეტილების შემდეგ განიხილა.