მოძრაობა „გაბედეს“ წევრებმა ქუთაისში, წერეთლის უნივერსიტეტთან ბრიფინგი გამართეს და სტუდენტების აქციაზე მოტყუებით წაყვანის ფაქტზე ისაუბრეს. "გაბედეს" წევრების თქმით, სტუდენტებს ატყუებენ, რომ ხვალ ღონისძიებაზე წაიყვანენ და არ ეუბნებიან, რომ რეალურად, "ქართული ოცნების" აქციაა.

მოძრაობის წევრები სტუდენტებს მოუწოდებენ არ მოტყუვდნენ და "ქართული ოცნების" აქციაზე გაუაზრებლად არ მოხვდნენ.

„სტუდენტებს ატყუებენ, რომ ევროკავშირის ღონისძიებაა, რეალურად, ყველამ ვიცით, რომ „ქართული ოცნების" აქციაა. სტუდენტებს პირდებიან თბილისში უფასოდ წაყვანას და კვებას. ამაში ჩართული არიან ლექტორები, რომელთა გამოცდებიც აქვთ ჩასაბარებელი სტუდენტებს. მოვუწოდებთ სტუდენტებს, არ მოტყუვდნენ და "ქართული ოცნების" ახალგაზრდული ფრთის ნაწილში არ მოხვდნენ", - განაცხადა გაგი ახალაძემ.

ბრალდებას არ ადასტურებენ წერეთლის უნივერსიტეტში. მათი თქმით, მსგავსი დირექტივა გაცემული არ არის და ლექტორები სტუდენტებს ღონისძიებაზე წასვლას არ აიძულებენ.