ახლა რომ გამოკითხვა ჩავატაროთ რამდენს ეამაყება, რომ ის პატარა ქართველია, კავკასიის მთების შვილი?! ეს ისეთი პრობლემებია, რომელზეც ძალიან სიღრმისეულად არის დასაფიქრებელი, - ამის შესახებ განათლების, მეცნიერებისა და კულტურის კომიტეტის თავმჯდომარის პირველმა მოადგილემ, ალექსანდრე ქანთარიამ პარლამენტის პლენარულ სხდომაზე განაცხადა, სადაც განათლების, მეცნიერების, კულტურისა და სპორტის მინისტრს, მიხეილ ჩხენკელს დეპუტატები „მინისტრის საათის“ ფორმატში უსმენენ.

ქანთარიამ მინისტრს კითხვით მიმართა, რა გეგმა გაქვთ ეროვნული ცნობიერების გაღვივების, სულიერების, რწმენის გაძლიერების კუთხით.

„აღარ მინდა დავამძიმო ეს ტრაგიზმით სავსე დღეები, რომლებშიც ჩვენ ვართ. ჩვენმა თაობამ ისწავლა იმ ქვეყანაში, რომელსაც საბჭოთა კავშირი ერქვა, იქ ვსწავლობდით სკოლებში, სადაც ხდებოდა მერხების მტვრევა, ფანჯრების მტვრევაც, კედლების დაზიანება, აყალმაყალიც, შფოთიც, მაგრამ მე არ მახსენდება, რომ სკოლას პოლიცია გამოეძახებინა. ყოველთვის ეს გვარდებოდა ხოლმე შიდა სფეროში. მიუხედავად იმისა, რომ ასეთ წარმონაქმნში ვცხოვრობდით, ყველას გვეამაყებოდა, რომ საქართველოში დავიბადეთ. რა გეგმა გაქვთ ეროვნული ცნობიერების გაღვივების კუთხით? რა გეგმაა სასკოლო სივრცეში? ხელოვნების, სულიერების, რწმენის გაძლიერების კუთხით თუ არის გეგმა? ახლა რომ გამოკითხვა ჩავატაროთ რამდენს ეამაყება, რომ ის პატარა ქართველია, კავკასიის მთების შვილი?! ეს ისეთი პრობლემებია, რომელზეც ძალიან სიღრმისეულად არის დასაფიქრებელი“, - განაცხადა ქანთარიამ.