ქუთაისის მერიის წინ მოძრაობა „გაბედეს“ აქტივისტებმა საპროტესტო აქცია გამართეს. მათ ქუთაისის მერიის ზედამხედველობის სამსახურის მიერ „გაბედეს“ აქტივისტების 1000-1000 ლარით დაჯარიმება გააპროტესტეს.
როგორც აქციის ერთ-ერთმა მონაწილემ, გაგი ახალაძემ „ინტერპრესნიუსს“ განუცხადა, მათ ქუთაისის ცენტრალური ნაძვის ხის მორთვა სცადეს ხელთნაკეთი სათამაშოებით, სადაც „ქართული ოცნების“ დეპუტატები იყვნენ გამოსახული.
მოძრაობა „გაბედეს“ აქტივისტის გარდა ათასლარიანი ჯარიმა პარტია „თავისუფალი საქართველოს“ თანათავმჯდომარეს, გოგი წულაიას მიუვიდა.
ზედამხედველების სამსახურში განმარტავენ, რომ ისინი ქალაქის იერსახის დამახინჯებისთვის დააჯარიმეს.
ქუთაისის მერიის ზედამხედველობის სამსახურის უფროსის მოადგილის, ეკატერინე გრიგოლაშვილის განცხადებით, დაჯარიმება ადმინისტრაციული კოდექსის 150-ე მუხლის მესამე ნაწილით მოხდა. დაჯარიმების საკითხზე ქუთაისის საქალაქო სასამართლო იმსჯელებს.