გორის მუნიციპალიტეტში, ატენის ხეობაში გაჩენილი ხანძრის სალიკვიდაციო სამუშაოებში შინაგან საქმეთა სამინისტროს საგანგებო სიტუაციების მართვის სამსახურის მეხანძრე-მაშველებისა და სპეცტექნიკის გარდა, თავდაცვის სამინისტროც ჩაერთო.
უწყების მუხლუხოიანი ტექნიკა ცეცხლის კერებამდე მისასვლელად გზის გაჭრის სამუშაოებს უზრუნველყოფს.
რთული რელიეფის გამო სახანძრო მანქანები ამ დრომდე ვერ ახერხებს ცეცხლის კერებამდე მისვლას. შესაბამისად, ძირითადი სამუშაოები ცოცხალი ძალის დახმარებით ხორციელდება და ასევე ქრობის პროცესში ინტენსიურად მონაწილეობს სასაზღვრო პოლიციის ვერტმფრენი.
თავდაცვის სამინისტროს მუხლუხოიანი ტექნიკის გარდა, ადგილზე იმყოფებიან აღნიშნული უწყების პირადი შემადგენლობის წარმომადგენლებიც. სალიკვიდაციო სამუშაოების მართვა იმ სამუშაო შტაბიდან ხდება, რომელიც შემთხვევის ადგილის სიახლოვეს გუშინ საღამოს შეიქმნა და აღნიშნული შტაბის შემადგენლობაში საგანგებო სიტუაციების მართვის სამსახურის ხელმძღვანელი პირები შიდა ქართლის გუბერნატორი და გარემოს დაცვის ეროვნული სააგენტოს წარმომადგენლები შედიან.
ამ დროისთვის იდენტიფიცირებულია ყველაზე რთული ლოკაციები და ინტენსიურ რეჟიმში მიმდინარეობს ხანძრის სალიკვიდაციო სამუშაოები.