ბათუმში მთავარი ნაძვის ხე დღეს საზეიმოდ აინთება. ამის შესახებ „ინტერპრესნიუსს“ აჭარის ავტონომიური რესპუბლიკის მთავრობის ტურიზმისა და კურორტების დეპარტამენტიდან აცნობეს. მათივე ინფორმაციით, წელს ბათუმი ახალი წლისთვის განსაკუთრებულად ემზადება.
მათივე ცნობით, წელს, საახალწლო ღონისძიებების ეპიცენტრმა ევროპის მოედნიდან საახალწლო ილუმინაციებითა და დეკორაციებით გაფორმებულ ბათუმის ბულვარში გადაინაცვლა.
„განსაკუთრებულად მოირთო ბულვარის შუა ხეივანი, სადაც დეკორატიული ბუჩქები საახალწლო სასაჩუქრე ფორმის სანათებით შეიფუთა. საახალწლო სამზადისი ბათუმში დასრულდა და საახალწლო განწყობაც ქალაქში უკვე იგრძნობა.
ბათუმსა და ქობულეთში მთავარი ნაძვის ხე საზეიმო ვითარებაში დღეს აინთება, რითაც სტარტს აიღებს მრავალფეროვანი საახალწლო ღონისძიებები. ზღაპრულად მორთული ბულვარი საახალწლო ღონისძიებებს 25 დეკემბრიდან - 7 იანვრის ჩათვლით უმასპინძლებს, ქობულეთში კი კონცერტები 1 იანვრამდე გაგრძელდება. ზამთრის ფესტივალს უმასპინძლებს კურორტი გოდერძიც, სადაც 28 დეკემბერს ტურისტებს საინტერესო მუსიკალურ და გასართობ პროგრამას შესთავაზებენ,- აღნიშნულია აჭარის მთავრობის ტურიზმისა და კურორტების დეპარტამენტის მიერ გავრცელებულ ინფორმაციაში.
კურორტ გოდერძის ფესტივალის, ბათუმისა და ქობულეთის საახალწლო პროგრამების ნახვა შემდეგ ბმულზეა შესაძლებელი - http://newyear.gobatumi.com/index.html.