„ფრთხილად! კულტურული მემკვიდრეობის ძეგლია!“ - ამ წარწერით პარტია „თავისუფალი საქართველოს“ თანათავმჯდომარემ, გოგი წულაიამ ქუთაისში, მესხიშვილის თეატრის წინ, ბუჩქებთან პლაკატები მიიტანა. პერფორმანსით პარტია „თავისუფალი საქართველოს” თანათავმჯდომარემ ქუთაისის მერიის ზედამხედველობის სამსახურის მიერ გამოწერილი 1 000-ლარიანი ჯარიმა გააპროტესტა. წულაია ამბობს, რომ ჯარიმის დაწერა ბუჩქების მორთვისთვის ხელისუფლების მხრიდან არაადეკვატური საქციელია.
„ესაა სისულელე, ბუჩქზე ერთი ფოთოლი არ დაზიანებულა. თვითონ ჩადიან ასეთ ფაქტებს, კვერცხებსა და ცოცხებს ესვრიან კულტურული მემკვიდრეობის ძეგლებს. მათ ქმედებას რეაგირება არ მოჰყვა. ხის მოჭრისთვის 500- ლარიანი ჯარიმაა, ბუჩქზე სათამაშოს დაკიდებისთვის 1 000 ლარი. ვაფრთხილებ მოსახლეობას, რომ თუ არ მოსწონხართ ქუთაისის მერიას, შეიძლება 1000 ლარით დაგაჯარიმონ“, - განაცხადა გოგი წულიამ.
პერფორმანსს მოძრაობა „გაბედეც“ შეუერთდა.
ჯარიმა ქუთაისის მერიის ზედამხედველობის სამსახურმა ადმინისტრაციულ სამართალდარღვევათა კოდექსის 150-ე მუხლის მესამე ნაწილით დაწერა, რაც კულტურული მემკვიდრეობის დაცვის არეალში ბუჩქებსა და ხე-ნარგავებზე პლაკატებისა და სათამაშოების თვითნებურად განთავსების აკრძალვას გულისხმობს.