ეკა ლალიაშვილი - წლის განმავლობაში აშკარად გამოიკვეთა არასრულწლოვნების მძიმე საგზაო შემთხვევებში მონაწილეობა, რომელსაც არაერთი მათგანი ემსხვერპლა

წლის განმავლობაში აშკარად გამოიკვეთა არასრულწლოვნების მძიმე საგზაო შემთხვევებში მონაწილეობა, რომელსაც არაერთი მათგანი ემსხვერპლა, - ამის შესახებ „საქართველოს ალიანსი უსაფრთხო გზებისთვის“ გამგეობის თავმჯდომარე, ეკა ლალიაშვილმა პრესკონფერენციაზე განაცხადა.

პრესკონფერენციაზე ლალიაშვილმა ავტოსაგზაო შემთხვევების სამი კვარტლის მონაცემებზე ისაუბრა.

„ძალიან მნიშვნელოვანია, ვისაუბროთ იმ პრობლემებზე, რაც საგზაო უსაფრთხოების სფეროში არსებობს, რადგან ეს არის ის გამოწვევა, რომელსაც წლების განმავლობაში, ნაბიჯ-ნაბიჯ ვცდილობთ ვუპასუხოთ. მოგახსენებთ 3 კვარტლის მონაცემებს. წინა წლებთან შედარებით ზოგადი მდგომარეობა თითქოსდა გაუმჯობესებულია სტატისტიკურად. საგზაო შემთხვევები 10%-ით არის შემცირებული, დაღუპულობა 2%-ით, თუმცა მე-4 კვარტალში უკვე იმდენად ხშირად გვესმის საგზაო შემთხვევების შესახებ, სადაც რამდენიმე პირი ერთად არის დაღუპული, რომ ჯერ კიდევ ვერ შევაფასებთ სრულად, რადგან უნდა ვნახოთ მე-4 კვარტლის შედეგები როგორი გვექნება.

აქ იკვეთება სხვადასხვა საკითხები. ჩვენ ვამბობთ, რომ საგზაო შემთხვევები სხვადასხვა მიზეზების გამო არის გამოწვეული, აქედან პირველი და წამყვანი არის სიჩქარის გადაჭარბება, მანევრირების წესების დარღვევა, მაგრამ ასევე უნდა ითქვას, რომ წლის განმავლობაში აშკარად გამოიკვეთა არასრულწლოვნების მძიმე საგზაო შემთხვევებში მონაწილეობა, რომელსაც არაერთი მათგანი ემსხვერპლა“, - განაცხადა ლალიაშვილმა.

მისივე თქმით, ასევე აღსანიშნავია ახალბედა მძღოლები, რომლებსაც სულ ახალი აღებული ჰქონდათ მართვის მოწმობა.

„ვფიქრობ, შემდეგი წლისთვის უნდა გავამახვილოთ ყურადღება იმაზე, რომ მხოლოდ 18 წლის მოზარდს მიცეს მართვის უფლება. ამავდროულად უნდა მოხდეს ავტოსკოლების ლიცენზირება. ჩვენ მუდმივად ვაწყდებით იმ საფრთხეებს, რომლებიც ცნობიერების დაბალი დონის გამო იქმნება და ეს გამოკვეთილად ჩანს ახალბედა მძღოლებში, რაც ნიშნავს იმას, რომ ავტოსკოლები თავიანთ ფუნქციას ვერ ასრულებენ. ისინი ვერ აძლევენ პოტენციურ მძღოლებს იმის ცოდნას, რომ მათ შემდეგ უსაფრთხოდ იარონ ქუჩებში. უნდა გავითვალისწინოთ სხვა ქვეყნების პრაქტიკა. ვფიქრობ, შემდეგი წლიდან უნდა დაიწყოს ხელისუფლებამ იმაზე ფიქრი, თუ როგორ მოხდეს ავტოსკოლების ლიცენზირება. ასევე დროა, სკოლებში და ბაღებში ჩავატაროთ გრძელვადიანი საგზაო უსაფრთხოების გაკვეთილები, თუ რასაკვირველია ჩვენ გვინდა გზებზე მოსიარულე უსაფრთხო მძღოლები მივიღოთ“, - განაცხადა ეკა ლალიაშვილმა.

თორნიკე ჯანაშვილი - ქვეყანა ღრმა ეკონომიკურ კრიზისშია  და მომავალ წელს უფრო მძიმე  კრიზისის  წინაშე  შეიძლება აღმოვჩნდეთ
ვიქტორ ყიფიანი - როგორიც არ უნდა იყოს რეგიონალური თუ საერთაშორისო კონიუქტურა, რისკების ასაცილებლად და შესაძლებლობების გამოსაყენებლად გზები დამოუკიდებლად უნდა ვეძებოთ
ქართული პრესის მიმოხილვა 10.08.2020
სევრის ხელშეკრულების 100 წლისთავი
„მოედანი“ - პროექტი, რომელიც ავლაბარს ახალ სიცოცხლეს შესძენს
ამერიკული სტეიკის მასტერკლასი ბათუმში