გორის მუნიციპალიტეტის მერი კონსტანტინე თავზარაშვილი, სოფლებში ტყვიავსა და ფლავში, ლალი გიგუაშვილისა და ლეილა დალაქიშვილის ოჯახებს ეწვია. მერმა მათ დამდეგი ახალი წელი მიულოცა და საჩუქრები გადასცა.
როგორც „ინტერპრესნიუსს“ გორის მუნიციპალიტეტის მერიიდან აცნობეს, აღნიშნული ოჯახები მერიამ მიმდინარე წელს, კოტეჯის ტიპის დროებით ნაგებობებში დააბინავა, რომლებიც უკიდურესად გაჭირვებული, უსახლკარო, სოციალურად დაუცველი ოჯახებისთვის შეიძინა.
„მანამდე ისინი გაუსაძლის, სიცოცხლისთვის საფრთხის შემცველ პირობებში შვილებთან ერთად ცხოვრობდნენ. ლალი გიგუაშვილისა და ლეილა დალაქიშვილის ოჯახების გარდა, საახალწლო საჩუქრები იმ 7 მიუსაფარ ოჯახსაც გადაეცა, რომლებიც გორის მუნიციპალიტეტის მერიამ ბოლო 2 წლის მანძილზე კოტეჯებში დააბინავა. კოტეჯები ხის დროებითი ნაგებობებია, რომლებიც აღჭურვილია წყლისა და გაზის გამათბობლებით, ასევე, გამართული შიდა კომუნიკაციით. თითოეული კოტეჯის ღირებულება 9600 ლარია. მიუსაფარი ოჯახები კოტეჯებით 2 წლის განმავლობაში ისარგებლებენ“, - ნათქვამია ინფორმაციაში.