საგარეო საქმეთა სამინისტრომ ლევან ალექსიძის ლექციების სერიის მეორე ლექციას უმასპინძლა

საქართველოს საგარეო საქმეთა მინისტრის მოადგილე ხათუნა თოთლაძემ ლევან ალექსიძის ლექციების სერიის მეორე ლექციას საგარეო საქმეთა სამინისტროში უმასპინძლა. ლექციას „აკადემიკოსი ლევან ალექსიძე და საერთაშორისო სამართლის სკოლის განვითარება საქართველოში“ ხათუნა თოთლაძე და პროფესორი ქეთევან ხუციშვილი წარუძღვნენ.

ლექციის ფარგლებში ყურადღება დაეთმო პროფესორ ლევან ალექსიძის წვლილს 1991 წლის 9 აპრილს საქართველოს რესპუბლიკის უზენაესი საბჭოს მიერ მიღებული საქართველოს სახელმწიფოებრივი დამოუკიდებლობის აღდგენის აქტში შეტანილი მთელი რიგი საკითხების შემუშავებაში. აღინიშნა ისიც, რომ 1991 წლის აპრილის დასაწყისში საქართველოს რესპუბლიკის პრეზიდენტმა ზვიად გამსახურდიამ, უზენაესი საბჭოს დეპუტატს, ლევან ალექსიძეს, და იმდროინდელ იუსტიციის მინისტრს, ჯონი ხეცურიანს, დაავალა იმავე წლის 31 მარტს ჩატარებული რეფერენდუმის შედეგებზე დაფუძნებით შეედგინათ აქტი, რომელიც გამოხატავდა საქართველოს მოსახლეობის მტკიცე და ერთსულოვან ნებას ქვეყნის დამოუკიდებლობის გამოცხადების აუცილებლობის შესახებ. საქართველოს სახელმწიფოებრივი დამოუკიდებლობის აქტი შეიცავდა უმნიშვნელოვანეს საერთაშორისო სამართლებრივ დებულებებს, მათ შორის ლევან ალექსიძის მრავალი წლის განმავლობაში ნაფიქრალ და პუბლიკაციებში ასახულ კონცეფციას საერთაშორისო სამართლის პრიმატის საქართველოში უზენაესი იურიდიული ძალის მქონე პრინციპად გამოცხადების შესახებ. აქტის მიხედვით, საერთაშორისო სამართლის პრიმატი საქართველოს რესპუბლიკის კანონების მიმართ და მისი ნორმების პირდაპირი მოქმედება საქართველოს ტერიტორიაზე გამოცხადდა საქართველოს რესპუბლიკის ერთ-ერთ ძირითად კონსტიტუციურ პრინციპად, რამაც შემდგომი განვითარება პოვა საქართველოს 1995 წლის კონსტიტუციაში.

აკადემიკოსი ლევან ალექსიძის მოღვაწეობა საქართველოს ტერიტორიაზე კონფლიქტების დარეგულირების საერთაშორისო სამართლებრივი საფუძვლების ძიებისა და დანერგვის პროცესში, რუსეთის მიერ საქართველოში 2008 წლის აგვისტოში შეჭრისა და ოკუპაციის საერთაშორისო სამართლებრივი ასპექტების წინა პლანზე წამოწევისა და თანამედროვე საქართველოს სახელმწიფოებრიობისთვის ძალზე დიდი მნიშვნელობის ოფიციალური დოკუმენტების ჭრილში იქნა წარმოჩენილი, რომლებიც პროფესორ ლევან ალექსიძის მიერ ან მისი თანაავტორობით არის შექმნილი. აკადემიკოს ლევან ალექსიძის პროფესიული მემკვიდრეობისა და მისი დაფუძნებული ქართული საერთაშორისო სამართლის სკოლის გასაგრძელებლად, ლევან ალექსიძის ლექციების სერია პროფესორ ქეთევან ხუციშვილის ინიციატივით დაფუძნდა. პირველი საზეიმო ლექცია ლეიდენის უნივერსიტეტის (ნიდერლანდები) პროფესორმა და სამართლის სკოლის ყოფილმა დეკანმა პროფესორმა რიკ ლოუსონმა წარმართა.

კახა გოგოლაშვილი - ევროკავშირის მედიაცია გახდა ინსტრუმენტი, რომელიც არ არის ერთჯერადი, სანამ კრიზისი არ მოგვარდება, ევროკავშირი ამ პროცესში ჩართული იქნება
ქართული პრესის მიმოხილვა 01.03.2021
ქართული კონსტიტუციის 100 წლისთავთან დაკავშირებით კავკასიის საერთაშორისო უნივერსიტეტი სამეცნიერო კრებულს ამზადებს
ევროპის გუნდი: ლიბერთი ბანკისთვის უზრუნველყოფილი დამატებითი დახმარებით, COVID-19-ის კრიზისის დასაძლევად  ევროპის საინვესტიციო ბანკის მიერ მიკრო, მცირე და საშუალო საწარმოების მხარდაჭერა ახალ ეტაპზე გადადის
"მაგნიტის" ყოველდღიური 20%-იანი აქცია უფრო მრავალფეროვანი ხდება
სამომხმარებლო სესხი 3-თვიანი სრული საშეღავათო პერიოდით - ტერაბანკის ახალი აქცია
ბაკურიანში საერთაშორისო სათხილამურო ფედერაციის ეგიდით მსოფლიო თასის ეტაპი სკი კროსში დასრულდა