რუსთავის პარკში მოწყობილი „საახალწლო სოფელი“, მეორე დღეა რუსთაველებს სადღესასწაულო ღონისძიებით მასპინძლობს

რუსთავის პარკში მოწყობილი „საახალწლო სოფელი“, მეორე დღეა რუსთაველებს სხვადასხვა სადღესასწაულო ღონისძიებით მასპინძლობს. როგორც „ინტერპრესნიუსს“ რუსთავის მუნიციპალიტეტის მერიიდან აცნობეს, „საახალწლო სოფელში“, პატარებისთვის საბავშვო და გასართობი შოუ პროგრამა, კონცერტი, ანიმატორებისა და საცირკო წარმოდგენა მოეწყო. მოგვიანებით კი, საახალწლო სოფლის სტუმრებისთვის მუსიკალური ჯგუფ „ჟირაფის“ კონცერტი გაიმართა.

მათივე ინფორმაციით, სადღესასწაულო ღონისძიებებს რუსთავის მერი ირაკლი ტაბაღუა ოჯახთან ერთად დაესწრო, თანაქალაქელებს დამდეგი ახალი წელი მიულოცა და „საახალწლო სოფელში“, 31 დეკემბერს დაგეგმილ დღესასწაულზე მიიწვია.

„საახალწლო ილუმინაციებით მორთულ და განათებულ პარკში მისულ ბავშვებს, თოვლის ბაბუამ დამდეგი შობა-ახალი წელი მიულოცა და საჩუქრები დაურიგა.

„საახალწლო სოფელში“ დასკვნითი სადღესასწაულო ღონისძიებები 31 დეკემბერს, 18:00 საათიდან დაიწყება. ასევე ჯგუფი „გუფი ლენდის“ კონცერტი და „წლის რუსთაველების“ დაჯილდოების ცერემონია გაიმართება“, - ნათქვამია ინფორმაციაში.