„ჯორჯიან მანგანეზი“ ჭიათურაში და ზესტაფონში საახალწლო ღონისძიებების გამართვას განაგრძობს.
როგორც „ინტერპრესნიუსს“ „ჯორჯიან მანგანეზიდან“ აცნობეს, კომპანია დღეს, ჭიათურის მოსახლეობას 5-დან 7-საათამდე გასართობ შოუ-პროგრამას შესთავაზებს. შოუ-პროგრამის გარდა „ჯორჯიან მანგანეზი“ ადგილობრივებს საახალწლო განწყობას ქალაქში მოსიარულე ორკესტრით შეუქმნის.
ასევე, კომპანია დღეს საღამოს ზესტაფონელებს საახალწლო კონცერტით უმასპინძლებს, სადაც საზოგადოების წინაშე სხვადასხვა ცნობილი ქართველი შემსრულებლები წარსდგებიან.
„ჯორჯიან მანგანეზის“ ადმინისტრაციული დირექტორის თემურ ხონელიას განცხადებით, კომპანია სოციალური დიალოგის ფარგლებში აქტიურობას 2020 წლის განმავლობაშიც გააგრძელებს.
„სოციალური დიალოგისა და პოლიტიკის ფარგლებში, კომპანიის აქტიურობა მხოლოდ ამ პროექტებით არ შემოიფარგლება და წლის განმავლობაში მნიშვნელოვანი ნაბიჯების გადადგმას გეგმავს, რაც მოსახლეობასთან ურთიერთთანამშრომლობის გაღრმავებასა და ორივე მხარისათვის სარგებლის მოტანას ისახავს მიზნად,“ - აღნიშნა თემურ ხონელიამ.
„ჯორჯიან მანგანეზი“ წინასაახალწლო ღონისძიებების ციკლს ჭიათურაში და ზესტაფონში 4 იანვრის ჩათვლით გააგრძელებს. ამ დრომდე კომპანიამ ღონისძიებები ჭიათურაში, მის მიმდებარე სოფლებში და ზესტაფონში 21-დან 25-დეკემბრის ჩათვლით უკვე გამართა. ასევე მისი მხარდაჭერით ჭიათურის აკაკი წერეთლის სახელობის პროფესიულ სახელმწიფო დრამატულ თეატრში 26 დეკემბერს ბავშვებისთვის და უფროსებისთვის ორი სპექტაკლი „მაკნატუნა“ და „მოუხელთებელი“ გაიმართა.