გრიპის ვირუსის გამო მომართვიანობამ უფრო მეტად მოიმატა დეკემბრის ბოლო კვირიდან, მათი უმრავლესობის მდგომარეობა სტაბილურია, - ამის შესახებ ფოთის ჰოსპიტალის ექიმმა გაგა ტყეშელაშვილმა განაცხადა. მისი თქმით, გართულებებს ადგილი არ ჰქონია.
„საკმარისი იყო ამბულატორიული მკურნალობა. რამდენიმე მათგანი განაგრძობს სტაციონარულ მკურნალობას ჩვენს კლინიკაში, მათი მდგომარეობაც აბსოლუტურად სტაბილურია. ყველას ვურჩევ, ხშირად დაიბანონ ხელები, გაანიავონ საცხოვრებელი ოთახი, მოერიდონ ხალხმრავალ ადგილებში კონტაქტს დღის განმავლობაში. თავის ტკივილის, ყელის ტკივილის, მაღალი ტემპერატურის დროს უნდა მიმართონ ოჯახის ექიმს. წელს გართულებები არ ყოფილა, არც იმის საჭიროება დამდგარა, რომ სხვა კლინიკაში გადაგვეგზავნა პაციენტი“, - განაცხადა ტყეშელაშვილმა.