"მედიის განვითარების ფონდის" (MDF) ორგანიზებით, მედიაწიგნიერების ფორუმი გაიმართა.
ღონისძიების ფარგლებში დაგეგმილი იყო: თემატური სემინარები, თამაშების ბაზრობა, ანეკდოტური მტკიცებულებების კვლევის პრეზენტაცია და ყველაზე მედიაწიგნიერი ახალგაზრდის დაჯილდოების ცერემონია, სადაც პრიზი გამარჯვებულს აშშ-ის საზოგადოებრივ საქმეთა განყოფილების უფროსმა, ქეთრინ შვაიცერიმა გადასცა.
როგორც „ინტერპრესნიუსს“ "მედიის განვითარების ფონდის" ხელმძღვანელმა, თამარ კინწურაშვილმა განუცხადა, პროექტის მიზანი არის ის, რომ ნებისმიერ მოქალაქეს ჰქონდეს უნარი გადაამოწმოს ყალბი ინფორმაცია, ვინაიდან, ციფრული მედიის ეპოქაში დღეისთვის ყველა ჟურნალისტია და მოქალაქეებს არ აქვთ პროფესიული რედაქტირების უნარები. მისი თქმით, ეს ძალიან მნიშვნელოვანია, რუსული დეზინფორმაციის გამოწვევის პირობებში.
„ჩვენ ვცდილობთ, რომ სხვადასხვა გზით, ეს იქნება ონლაინ თამაშებით, სემინარებით, თუ კვლევებით ამ პროცესს ხელი შევუწყოთ. ბევრმა ახალგაზრდამ მიიღო მონაწილეობა კონკურსში. დაჯილდოვდა საუკეთესო გამარჯვებული. მიმდინარეობს ონლაინ თამაშები, სადაც ტროლების იდენტიფიცირებას, ყალბი ინფორმაციის ამოცნობის უნარებს ეცნობიან ახალგაზრდები“, - განაცხადა თამარ კინწურაშვილმა.
პროექტის მხარდამჭერია აშშ-ს საელჩო საქართველოში.