ვარკეთილში, „ანას ბაღთან“ აქციაზე დაპირისპირების შედეგად, დაკავებული 4 პირი შსს-მ ხელწერილის საფუძველზე გაათავისუფლა. „ინტერპრესნიუსის“ ინფორმაციით, მათ შსს-ს შენობა ცოტა ხნის წინ დატოვეს.
ცნობისთვის, დაპირისპირების შედეგად „ანას ბაღთან“ დღის მეორე ნახევარში 4 პირი დააკავეს.
რაც შეეხება კიდევ ექვს დაკავებულს, თბილისის საპატრულო პოლიციის უფროსის, კახა ბუხრაძის განცხადებით, 4 მათგანი თბილისის საქალაქო სასამართლოში, 2 მათგანი კი საპატრულო პოლიციის დეპარტამენტშია გადაყვანილი.
„ისინი 173-ე და 166-ე მუხლებით არიან დაკავებულნი, რაც წვრილმან ხულიგნობასა და პოლიციის თანამშრომლის კანონიერი მოთხოვნის დაუმორჩილებლობას გულისხმობს",-განაცხადა კახა ბუხრაძემ.
ცნობისთვის, მოსახლეობის მოთხოვნაა, ვარკეთილში, ზემო პლატოს 21-ე და 22-ე კორპუსების მიმდებარედ 10- სართულიანი კორპუსი არ აშენდეს და ისევ გამწვანება დარჩეს.