გამომძიებელმა დაადასტურა, რომ მას შემდეგ, რაც თამთა თოდაძემ 112-ში დარეკა და თავისი პოზიცია დააფიქსირა, შემთხვევის ადგილის დაცვა უწყვეტ რეჟიმში მიმდინარეობდა. მთელი ამ ხნის განმავლობაში კი, დაზარალებული მხარე აპელირებდა, თითქოს, საგამოძიებო მოქმედებები გვიან ჩატარდა, - ამის შესახებ საკრებულოს ბრალდებული დეპუტატის, ილია ჯიშკარიანის ადვოკატმა მარიამ კუბლაშვილმა სასამართლო პროცესის შემდეგ განაცხადა.

ადვოკატის განმარტებით, საგამოძიებო ორგანოს თამთა თოდაძე ალკოტესტზე უნდა შეემოწმებინა, რაც მათ არ გაუკეთებიათ.

„გამომძიებელს კითხვა დავუსვით, ჩაუტარდა თუ არა, თამთა თოდაძეს ალკოტესტი, ვინაიდან მან თავად განაცხადა, რომ ის ნასვამ მდგომარეობაში იმყოფებოდა, მნიშვნელობა არ აქვს, ალკოჰოლი რამდენი მიიღო მან, საგამოძიებო ორგანოს ვალდებულება გააჩნია დასაკითხი მოწმე შეამოწმოს, რამდენად ადეკვატურია ის“, - განაცხადა კუბლაშვილმა.