საქართველოს პრეზიდენტი სალომე ზურაბიშვილი გურიაში მცირე და საშუალო ბიზნესის წარმომადგენლების, მათ შორის ქალი მეწარმეების საქმიანობას, მათი წარმატების ფაქტორებსა და იმ გამოწვევებს გაეცნო, რომლის წინაშეც ისინი დგანან. ამის შესახებ „ინტერპრესნიუსს“ საქართველოს პრეზიდენტის ადმინისტრაციიდან აცნობეს.
მათი ინფორმაციით, სალომე ზურაბიშვილმა ქალთა გაძლიერებასა და ბიზნეს საქმიანობაში მათი ჩართულობის მნიშვნელობასა და მათი წარმატებული გამოცდილების გაზიარებაზე ისაუბრა.
„როგორც ყველა რეგიონული ვიზიტის შემთხვევაში, გურიაშიც ჩემი მთავარი ინტერესის საგანი რეგიონის განვითარებაა. შევხვდი მცირე და საშუალო ბიზნესის წარმომადგენლებს, რომლებიც ძალიან წარმატებულები არიან, განსაკუთრებით ქალები. ეს ძალიან მნიშვნელოვანია ქვეყნის განვითარებისთვის. მნიშვნელოვანია, რომ ბიზნესის სხვადასხვა მიმართულებით ასეთი ენერგია, შემართება და წარმატებული შედეგებია. მე ძალიან გამხნევებული და იმედიანი ვარ ამით“, - განაცხადა საქართველოს პრეზიდენტმა.