არჩილ თალაკვაძე - მოვისმინე ხორავას ქუჩაზე მომხდარი მკვლელობის საქმეში დაზარალებულის განცხადება, სადაც მან თქვა, რომ კითხვები აღარ აქვს და მისი მხრიდან პრეტენზიები ამოწურულია
მე მოვისმინე ხორავას ქუჩაზე მომხდარი მკვლელობის საქმეში დაზარალებულის განცხადება, სადაც მან თქვა, რომ კითხვები აღარ აქვს და მისი მხრიდან პრეტენზიები ამოწურულია, - ამის შესახებ პარლამენტის თავმჯდომარე არჩილ თალაკვაძემ ჟურნალისტებს განუცხადა, რითაც გამოეხმაურა გენერალური პროკურორობის კანდიდატად ირაკლი შოთაძის წარდგენას. მისი თქმით, პროკურატურამ ამ საქმის გამოძიებით დაამტკიცა, რომ ირაკლი შოთაძის მხრიდან სუბიექტური ინტერესები არ ყოფილა. თალაკვაძის განცხადებით, პარლამენტი ამ ფაქტორს გაითვალისწინებს.
„მე მოვისმინე დაზარალებულის განცხადება ამ საქმესთან დაკავშირებით, სადაც მან თქვა, რომ მას კითხვები აღარ აქვს და მისი მხრიდან პრეტენზიები ამოწურულია იმ ნაწილში, როდესაც ვხედავდით, რომ გამოძიების პირველ ეტაპზე გენერალური პროკურორის მიმართ იყო კითხვები და კრიტიკა. პროკურატურამ ამ საქმის გამოძიებით დაამტკიცა, რომ აქ არავითარი სუბიექტური ინტერესები გენერალური პროკურორის მხრიდან არ არსებობდა. შესაბამისად, ეს გათვალისწინებული იქნება პარლამენტის მიერ,“ - განაცხადა არჩილ თალაკვაძემ.
