ე.წ. ციანიდის საქმეზე მსჯავრდებული დეკანოზის, გიორგი მამალაძის ძმის, თორნიკე მამალაძის განცხადებით, სასულიერო პირს პარალიზებული ფეხი 2 სანტიმეტრით დაუმოკლდა. აღნიშნულის შესახებ თორნიკე მამალაძემ „ინტერპრესნიუსს“ განუცხადა.

როგორც სასულიერო პირის ძმა განმარტავს, გიორგი მამალაძის ჯანმრთელობის მდგომარეობა კრიტიკულად არის გაუარესებული.

„საქმე ისევ რთულადაა. ჩემ ძმასთან წინა კვირას სასჯელაღსრულების დაწესებულების ექიმები იყვნენ შესული, პარალიზებული ფეხი გაუზომეს და 2 სანტიმეტრით დამოკლებული აღმოჩნდა. ამით დასტურდება ის, რასაც მთელი ამ ხნის განმავლობაში ვამბობდით, რომ დეკანოზის ჯანმრთელობის მდგომარეობა კრიტიკულად გაუარესებულია, მას ახლა პენიტენციურ დაწესებულებაში არანაირი მკურნალობა არ უტარდება“, - განაცხადა მამალაძემ.

თორნიკე მამალაძის განმარტებითვე, ადამიანის უფლებათა დაცვის ცენტრი დეკანოზ გიორგი მამალაძის სასჯელის გადავადებასთან დაკავშირებით სარჩელს ამზადებენ.