საერთაშორისო სავალუტო ფონდის ხელმძღვანელის თქმით, გლობალურმა ეკონომიკურმა რისკებმა შესაძლოა, ე.წ. დიდი დეპრესია დააბრუნოს, რასაც უთანასწორობა და ფინანსური სექტორის არასტაბილურობა გამოიწვევს.
ვაშინგტონში, საერთაშორისო ეკონომიკის ინსტიტუტში საუბრისას კრისტალინა გეორგიევამ განაცხადა, რომ დღეს მიმდინარე პროცესების დროს იგივე ტენდენციები შეიმჩნევა, რაც 1920-იან წლებში იყო.
„ასეთი შემაშფოთებელი ტენდენციები შეიმჩნეოდა მე-20 საუკუნის პირველ წლებში, როდესაც ტექნოლოგიებმა და ინტეგრაციამ მრისხანე 20-იან წლებამდე მიიყვანა სამყარო, ფინანსურ კატასტროფამდე“,-განაცხადა გეორგიევამ.
მისი თქმით, ქვეყნებს შორის „გადაჭარბებული უთანასწორობა აფერხებს ზრდას და შეუძლია პოპულიზმსა და პოლიტიკურ აჯანყებებს შეუწყოს ხელი”.
„დიდი დეპრესია“, მასიური გლობალური ეკონომიკური ვარდნა, გრძელდებოდა 1929 წლიდან დაახლოებით 10 წლის განმავლობაში. მან გამოიწვია უამრავი ბანკის გაკოტრება, რეკორდული უმუშევრობა, ისევე, როგორც მთლიანი ეროვნული პროდუქტის, ინდუსტრიული წარმოების, აქციათა ბაზარზე ფასთა და ასევე პრაქტიკულად ეკონომიკის ზრდის ყველა პარამეტრის მკვეთრი ვარდნა.